ZITTO KABWE AVURUMISHA MAKOMBORA MAZITO CHADEMA

 "Lissu anasema nimepewa magari 2 na Mzee Mkono. Anasema kaambiwa na Mkono.

Naamini Mkono alimwambia pia mwaka 2005 alimpa Freeman Aikaeli Mbowe tshs 40m ili Mbowe asifanye kampeni Musoma vijijini.

Nadhani alimwambia pia mwaka 2008 (baada ya orodha ya mafisadi kutangazwa 2007) Mkono alimpa Freeman tshs 20m za uchaguzi wa Tarime na Freeman akasema kwenye chama ametoa mkopo na akalipwa.

Nadhani alimwambia pia kuwa Mwaka 2010 Mkono alimpa Mbowe tshs 200m za kampeni ya Slaa.

Pia hakusahau kumwambia kuwa Rostam Aziz alimpa Mbowe tshs 100m za kampeni. Lissu anajua kuwa gazeti la Tanzania Daima limeanzishwa na fedha za chama kutoka Conservative party?

Nimefanya internship yangu kwa Mkono and Company Advocates kuhusu masuala ya mikataba.

Mzee Mkono ni Mzee wangu na alisaini petition ya kumtoa Waziri Mkuu Pinda.
Lissu awaambie waliyemtuma wamwambie ukweli wote.

Lissu ajue yeye ni kifaranga tu, Mimi namtaka mama wa kifaranga ajitokeze. Aeleze aliingia deal gani na Kinana na Sumaye mwaka 2005 kufuatia deni lake NSSF.

Aweke wazi mkataba kati yake na NHC kuhusu nyumba ya Umma ilipo Club Bilicanas.

They must know I am not a push over. Chacha died, I won't.

Mtu ambaye hawezi kuheshimu mke wake aliyemzalia watoto hawezi kunyooshea mtu kidole kuhusu maadili."

Imetumwa na Editorial Team saa 2:51 AM kwenye habari za kitaifa

KIJANA ACHEZEA MKONG'OTO BAADA YA KUJIFANYA KIJOGOO KWA MKE WA MTU

KIJANA ACHEZEA MKONG'OTO BAADA YA KUJIFANYA KIJOGOO KWA MKE WA MTU

HAPA AKIOMBA MSAMAHA BAADA YA KUWEKEWA MTEGO NA KULA KICHAPO CHA KUFUNGIA MWAKA

NIKITOKA HAPA SITARUDIA TENA, NDIVYO ANAVYOONEKANA KUSEMA KIJANA HUYU MKAAZI WA KITUNDA.

Imetumwa na Editorial Team saa 1:53 AM kwenye habari za kitaifa

MFAHAMU JAJI AUGUSTINO RAMADHANI, TOKA BRIGEDIA JENERALI, JAJI MKUU HADI UCHUNGAJI.

Zanzibar.Baba wa Taifa alipendelea sana kuitwa Mwalimu, kazi aliyoanza kufanya kabla ya kuwa Rais wa kwanza na hadi anastaafu urais jina la Mwalimu hakuliacha hadi mauti yalipomkuta.

Hii inakuwa ni vigumu kwa mtu aliyetumikia nafasi nyingi kwa nyakati tofauti na kwa mafanikio mazuri, nasema mazuri kwa sababu Jaji Augustino Ramadhani aliyestafu Ujaji Mkuu alipaswa pia kuitwa Brigedia Jenerali kwa kuwa pia alilitumikia Jeshi hadi kufikia ngazi hiyo ya Brigedia Jenerali kabla ya kuitwa katika sekta  ya sheria na kutumikia Mahakama hadi kufikia ngazi ya juu kabisa ambayo pia wengi hupenda kuandikwa kwa vyeo walivyowahi kutumikia na kwa sasa amepewa kazi ya ukasisi.

Mbali na kustaafu ujaji, wiki iliyopita alipewa kazi ya ukasisi, alitawazwa rasmi kuwa Mchungaji wa Dayosisi ya Kanisa la Anglikana lililopo Mkunazini Zanzibar  na hivyo kustahili kuitwa cheo cha Mchungaji Augustino Ramadhani.

Mchungaji Augustino aliiambia Mwananchi kuwa alizaliwa Visiwani Zanzibar, Mtaa wa Kisima Majongoo kwenye familia ya watoto wanne wa Mwalimu Mathew Douglas Ramadhani na Bridget Anna Constance Masoud akiwa ni mtoto wa pili katika familia hiyo, aliishi kwa miaka mitatu Visiwani huko na kisha alikuja Tanzania Bara (Tanganyika) akiwa na umri wa kuanza masomo hadi alipohitimu  masomo ya sekondari katika Shule ya Wavulana Tabora na wakati akiwa sekondari ndipo alilpojifunza kupiga kinanda akirithi kipaji cha babu yake Augustino Ramadhani.

Jaji Ramadhani alihitimu elimu ya sekondari mwaka 1965 na kujiunga na elimu ya juu katika Chuo Kikuu cha Dar es Salaam katika fani ya sheria hadi mwaka 1970 alipojiunga katika Jeshi la kujenga Taifa kwa mujibu wa sheria, baadaye aliajiriwa katika Jeshi la Ulinzi la Wananchi (JWTZ) alikofanya kazi za sheria.

Mafanikio zaidi

Alifafanua kuwa aliitwa na aliyekuwa Rais wa pili wa visiwa hivyo, Alhaji Aboud Jumbe mwaka 1978 na kumteua kuwa Naibu Jaji Mkuu kabla ya kuwa Jaji Mkuu wa Zanzibar na mwaka huo huo aliitwa tena jeshini kwa ajili ya kushiriki vita ya Kagera, alipelekwa Uganda na kukaa kwa zaidi ya miezi kumi.

Baada ya vita kumalizika alirudi Tanzania kuendelea na kazi katika sekta ya Sheria na mwaka 1980 aliapishwa kuwa Jaji Mkuu wa Zanzibar.

Anasema, mfumo wa Mahakama  Visiwani haukuwa wa kisheria na alifanikiwa kuubadilisha na kuweka mfumo wenye ngazi za Kimahakama kutoka Wilaya,  Mkoa hadi Mahakama Kuu. Anabainisha kuwa hii ilitokana na kutokuwepo na watu waliosomea sheria ili kuajiriwa katika sekta ya sheria.

“Nilifanikiwa kuondoa mfumo wa mabaraza (Peoples Court) na kuweka mfumo wa mahakama uliofuata ngazi za kimahakama na mahakama ya Rufaa haikuwepo kabisa”, anasema.

Pia aliapishwa kuwa Jaji wa Mahakama ya Rufaa mwaka 1989, mwaka 1990 alihamia jijini Dar es Salaam na Mwaka 1993 hadi 2003 aliteuliwa pia kuwa Makamu Mwenyekiti wa Tume ya Uchaguzi Tanzania Bara na mnamo mwaka 2002-2007  aliteuliwa kuwa Mwenyekiti wa Tume ya Uchaguzi Zanzibar na katika kipindi hicho hicho alikuwa mmoja wa Majaji sita wa Mahakama ya Afrika Mashariki, pia alikuwa ni mmojawapo wa Majaji 11 waliochaguliwa na Marais wa Afrika kwa ajili ya kuitumikia Mahakama ya Afrika ya Haki za Binadamu na ndipo mwaka 2006 alipoteuliwa na Rais Jakaya Kikwete kuwa Jaji Mkuu wa Tanzania.

Baada ya kustaafu kazi ya Ujaji Mkuu mwaka 2010, Jaji Augustino Ramadhani alikataa kuendelea na kipindi kingine baada ya kufanikiwa kufafanua kifungu kinachokataza Jaji kuendelea na kazi ya Ujaji baada ya umri wake wa kustaafu na kuendelea kwa  mkataba  wa ajira, ila anaruhusiwa kuongeza kipindi kimoja tu hata kama bado anazo nguvu za kutumikia Taifa.

Mara baada ya kusimikwa kuwa Mchungaji anasema,  hakuna tofauti kati ya kazi ya Mahakama na kazi ya  Uchungaji kwani zote ni kazi za kufanya maamuzi ya watu wanaodai wapatiwe haki na kubainisha kazi za mahakama ukiamua umeamua ila za kanisa zinataka makubaliano na maridhiano japo zote ni kazi za Mungu.

“Kazi hii ya uchungaji mimi sikuifikiria hata siku moja kwamba nitaifanya ingawa nilisomea nchini Uingereza  na kutunukiwa stashahada. Pia nilikuwa nikishiriki katika shughuli za madhabahuni hasa wakati wa kuwasimika maaskofu kwa kuwa nilikuwa mwanasheria wa kanisa hili hadi nilipoteuliwa kuwa Jaji Mkuu ndipo nilipoamua kuacha wadhifa huo ili kuepuka migongano,”anasema Jaji Ramadhani.

Atafutwa

“Askofu alinifuata mara kwa mara ingawa nilikuwa nikimkatalia lakini mwisho nilikubali kwa kuona kuwa ni sauti ya Mungu iliyokuwa ikiniita kupitia kwake na ndio  leo hii baada ya kutumikia ushemazi kwa zaidi ya miezi sita  nimesimikwa rasmi kuwa mhudumu wa madhabahuni.”

Kwa upande mwingine Jaji anasema, lengo lake lilikuwa baada ya kustaafu akafundishe na lengo hilo limetimia kwani pia kwa sasa ni  Makamu Mkuu wa Chuo cha Tumaini Iringa anapofundisha sheria.

Pia itakumbukwa kuwa wiki hii amekamilisha kazi ya kuunda rasimu mpya ya katiba alipoteuliwa mwaka jana kuwa Makamu Mwenyekiti wa Tume ya Mabadiliko ya Katiba ya Tanzania.

Hali ya Zanzibar

Akizungumzia hali ya vugu vugu la hali ya visiwani humu kuhusu kushambuliwa kwa viongozi wa dini na kuharibiwa kwa nyumba za ibada anasema tangu miaka ya nyuma akiwa mdogo anakumbuka jinsi walivyokuwa wakishirikiana vizuri na majirani zao kuadhimimisha sikukuu za kidini bila kujali tofauti ya za dini.

“ Nakumbuka wazazi wangu walikuwa wanamwita Mwislamu kuja kuchinja kuku ili wasikwazike wanapokaribishwa kujumuika katika chakula, kwa kuwa walijua kuwa nyama wanayokula  imechinjwa kwa taratibu za dini yao na haitamkwaza na wao pia walikuwa wakitualika kwenye sikuku zao na tulikuwa tukifurahia pamoja.”

Mwananchi pia ilishuhudia amani iliyokuwepo wakati misa ya kumwapisha Jaji Mstaafu Augustino Ramadhani ilipokuwa ikifanyika na hakuwa na uvunjivu wa aina yoyote ya amani licha kuwepo na ulinzi wa kawaida na hakukuwa na Polisi  kama ilivyokuwa wakati wa mkesha wa Siku Kuu ya Krismasi.

Wageni walikuwa wengi na kanisa lilijaa watu waliokuja kushuhudia tukio hilo la kusimikwa kwake.

Imetumwa na Editorial Team saa 1:25 AM kwenye Ana Kwa Ana

Chadema ngoma nzito,wafuasi watwangana makonde mahakamani

Dar es Salaam. Vurugu za aina yake zimezuka katika Mahakama Kuu jijini Dar es Salaam, baada ya watu wanaodhaniwa kuwa wanachama wa Chadema  kumzomea aliyekuwa Naibu Katibu Mkuu wa Chama hicho,  Zitto Kabwe.

Vurugu hizo zilihusisha wafuasi wa chama hicho wanaomuunga mkono Zitto na wale wanaompinga, ambao walikuwa wamebeba mabango ya kumsifia na wengine wakiwa wamebeba ya kumkashifu.

Katika vurugu hizo, baadhi ya wanachama hao waliamua kufanya doria isiyo rasmi ndani ya mahakama hiyo ya kuwasaka watu waliodai kuwa ni mamluki,  huku wakimkamata askari kanzu, kabla ya kumpiga ngumi na kumchania shati mtu mmoja wakidai kuwa alikuwa akiwarekodi kwa kutumia simu yake ya mkononi.

Tukio hilo la aina yake lilitokea jana asubuhi ambapo kundi la wanachama hao, huku baadhi wakiwa wamevaa nguo za kaki zinazotumiwa na chama hicho kufika katika mahakama hiyo kwa lengo la kusikiliza  kesi ya pingamizi iliyofunguliwa na Zitto. 

Mara baada ya kuwasili kwa Mbunge huyo wa Kigoma Kaskazini, huku akiwa ameongozana watu kadhaa wakiwamo wanasheria wake na mabaunsa, wanachama hao walianza kumzomea huku baadhi wakimwita fisadi.

Hali hiyo iliibua zogo katika eneo la mahakama hiyo, hali iliyowalazimu maofisa kadhaa wa polisi kuingilia kati kwa kuamua kumchukua Zitto na kumhifadhi kwenye chumba maalumu na kumtoa saa 6 mchana kesi yake ilipoanza kusikilizwa.  Baadhi ya mabango ya kumkashifu  yalisomeka; Zitto tulimpenda, CCM imempenda zaidi, Zitto rudisha fedha za CCM.

Yale yaliyomsifia yalisomeka; Zitto kama Mandela na Zitto ni Mkombozi.Baada ya kumalizika kusikilizwa kwa kesi hiyo, saa 12 jioni wanachama hao walianza kurushiana ngumi, hasa baada ya kuibuliwa kwa mabango yaliyosomeka ‘Zitto kwanza Chadema baadaye’.

Awali hali hiyo ilimfanya Zitto kutaharuki, huku mabaunsa wake wakijihami na kuanza kumlinda.

Baada ya Zitto kuhifadhiwa baadhi ya wanachama hao ambao waliingia kwa kuandikishwa majina yao getini, walianza kuwasaka watu waliowahisi  kuwa mamluki, ambapo walimnasa askari kanzu na kuanza kumzonga wakimuhoji anapeleleza nini katika eneo hilo.

“Hapa tunataka kujua wewe ni nani na unataka nini hapa, maana hatukuelewi kabisa kwa nini unakuja kusikiliza mazungumzo yetu, jitambulishe,” alisisika mmoja wa wanachama hao akimhoji askari huyo huku akiwa amemkandamiza ukutani,

“Tunajua wewe ni askari kwa nini hujavaa sare leo? Kisha unajichanganya kwenye kundi letu.”

Kesi hiyo ilimalizika saa 12 jioni ambapo Zitto alitolewa chini ya ulinzi mkali wa polisi kwa kupitia mlango wa nyuma wa mahakama hiyo na kuwaacha wafuasi hao wakionyeshana ubabe kwa mabango na kauli za kejeli.

Ndani ya mahakama

Kabla ya kuanza kwa kesi hiyo, Mwanasheria Mkuu wa Chadema, Tundu Lissu alimwomba Jaji John Utamwa kuendesha kesi hiyo kwa lugha ya Kiswahili kwa kuwa inagusa  sehemu ya masilahi ya umma, jambo ambalo liliibua shangwe kwa wafuasi wa chama hicho waliokuwa wamefurika katika mahakama hiyo.

Hata hivyo baada ya kesi kuanza kuendeshwa kwa lugha  ya Kiswahili,  Jaji Utamwa alilazimika kuikatiza, na kuwakemea wanachama wa Chadema baada ya sauti za kuguna kusikika wakati wakili wa Zitto,  Albert Msando alipokuwa akiwasilisha hoja kuhusu msingi wa kesi hiyo.

“ Nataka kuwakumbusha hapa mahakamani ni tofauti na sehemu nyingine sauti zinazosikika sizitaki, anayeona kwamba yanayozungumzwa hakubaliani nayo kama hawezi kunyamaza atoke nje vinginevyo hatua za kisheria zitachukuliwa,” alisema Jaji Utamwa.

 Kundi la Wanachadema hao huku wengine wakiwa wamevalia sare zao waliwasili mahakamani hapo ili kusikiliza kesi ya pingamizi iliyofunguliwa na Kabwe akiiomba Mahakama iwazuie Bodi ya Wadhamini wa Chadema, Katibu Mkuu pamoja na Kamati Kuu ya Chadema jana kumjadili, kumchukulia hatua, uamuzi wowote wala kuhusu uanachama wake.

Msingi wa kesi

Juzi Zitto aliomba  Mahakama hiyo kuzuia Kikao cha Kamati Kuu ya Chadema  kumjadili hadi rufaa yake aliyoikata kwenye Baraza Kuu  la Chadema  itakaposikilizwa na kuamuliwa na wazuiwe kumwingilia katika utekelezaji wa majukumu yake ya ubunge wa Kigoma Kaskazini .

Pia aliiomba Mahakama hiyo Kuu kumwamuru  Katibu Mkuu wa Chadema, Dk Wilbroad Slaa  ampatie nakala ya mashtaka na maelezo ya uamuzi uliofikiwa na  Kamati Kuu  Novemba 22, 2013 na kusababisha avuliwe nyadhifa zake ili aweze kupeleka rufaa yake Baraza Kuu la Chadema kupinga uamuzi huo.

Imetumwa na Editorial Team saa 1:18 AM kwenye habari za kitaifa

CCM yamtolea uvivu Lowassa urais 2015

Dar es Salaam. Unaweza kusema sasa Chama Cha Mapinduzi (CCM) kimeamua kumfungia kazi Waziri Mkuu wa zamani, Edward Lowassa baada ya jana Makamu Mwenyekiti wake (Bara), Phillip Mangula kusema kuwa wanachama wake walioanza mbio za kuwania urais mwaka 2015 watachukuliwa hatua kali za kinidhamu.

Mangula alisema kama wanachama hao wasipochukuliwa hatua watakifanya chama hicho kupoteza mvuto katika medani ya kisiasa nchini;

“Wapo watu wanataka waichanechane CCM kwa sababu ya uroho wao wa madaraka, uroho wa udiwani, ubunge na hata urais. Kuna makundi ndani ya chama kazi yake ni kuwabomoa wenzao, kamwe hatuwezi kuyafumbia macho.”

Akifafanua hilo Mangula alisema: “Tutawaita wote walioonyesha nia ya kuutaka urais 2015 na kuwahoji kwanini wanafanya hivyo wakati muda bado haujafika. Tumeshawachunguza katika mikutano wanayoifanya, tumebaini kuwa wanatoa misaada na kusafirisha watu, tunajua dhamira yao ni nini.”

Mangula ametoa kauli hiyo ikiwa imepita siku moja tangu Katibu wa Itikadi na Uenezi wa chama hicho, Nape Nnauye kusema mwanachama yeyote wa CCM anayetangaza nia ya kuwania urais kabla ya muda mwafaka kutangazwa atapoteza sifa za kugombea.

Nape alitoa kauli hiyo baada ya Lowassa siku mbili zilizopita, kutangaza nia ‘kimtindo’ akisema anaanza rasmi safari aliyoiita ya matumaini ya ndoto zake, ambayo pia itatimiza ndoto za Watanzania za kupata elimu bure, maji safi na maendeleo ya uhakika.

Lowassa ambaye amekuwa akitajwa kuwa mmoja wa wagombea wa nafasi ya urais kupitia CCM katika Uchaguzi Mkuu wa 2015, alitoa kauli hiyo katika ibada ya shukrani ya kuupokea mwaka mpya, katika Kanisa la Kiinjili la Kilutheri Tanzania (KKKT), Usharika wa Monduli.

Mangula aliwashukia vigogo wa chama hicho wanaoutaka urais jana katika Kikao cha Halmashauri Kuu ya Kamati ya Siasa tawi la Ofisi ndogo za chama hicho Lumumba, wakati akitoa salamu za mwaka mpya kwa wanachama wote wa CCM nchini.

Ataja kanuni za uongozi

Katika mkutano huo Mangula alisaidiwa kusoma kanuni za uongozi na maadili ya chama hicho, kutolea ufafanuzi mambo mbalimbali na Katibu Tume ya Udhibiti wa Nidhamu ya Viongozi wa CCM na wanachama taifa, Masoud Mbengula.

Moja ya kanuni hizo inasema “Ni mwiko kwa kiongozi wa CCM kutumia dini yake au kabila au rangi au jinsia au eneo analotoka, kama sifa ya kushawishi wapiga kura wamchague ama yeye mwenyewe ama mgombea anayemuunga mkono.”

Mangula alisema kwa mujibu wa kanuni za chama hicho, mwanachama anayefanya mambo kinyume na kanuni huitwa msaliti na hafai kuendelea kufumbiwa macho kwani anaweza kukiangamiza chama wakati wowote.

“Tutawachukulia hatua kali wale wote ambao wameanza kuonyesha dalili kama hizo za kutoa michango, misaada, zawadi. Lengo la mwanachama huyo ni kutaka kuungwa mkono, wanaotaka madaraka wasubiri muda ufike ndiyo wafanye hivyo.”

Aliongeza “Hivi haya mapenzi ya kusaidia yameanza lini, fedha hizo zinatoka wapi, hawa wanaosadiwa wanatakiwa kutambua kuwa yote hayo ni kampeni kwa kuwekeza, hatuwezi kuwa na viongozi wa nchi wa namna hii wa uchu wa madaraka, CCM haitawafumbia macho lazima kanuni na miongozo ifuatwe.”

“Kuna watu wameanza kudhani kuwa muda wa kampeni umeanza, muda wa kampeni haujafika na hakuna majina yaliyotangazwa ya kugombea udiwani, ubunge hata urais,” alisema Mangula na kuongeza;

“Kuna makundi yanaifanya nchi ya Somalia isitawalike. Makundi ya aina hiyo naona yapo hata CCM; watu wanaibua vita ya maneno ndani ya chama, wanataka wakichanechane chama kwa sababu ya uroho wa madaraka tu.”

Bila kuyataja makundi hayo Mangula alisema: “Utaongozaje nchi ambayo imegawanyika katika makundi? Watu wameanza kuvuruga chama chetu, kila mtu ana kundi lake na wakati mwingine wanayatumia makundi kuwabomoa wenzao, hili jambo hatuwezi kulifumbia macho hata kidogo.”

Mbali na Lowassa, wengine wanaotajwa kuwania nafasi hiyo ni pamoja na Waziri wa Mambo ya Nje na Ushirikiano wa Kimataifa, Benard Membe, Waziri wa Ushirikiano wa Afrika Mashariki, Samuel Sitta, Mbunge wa Songea Mjini, Dk Emmanuel Nchimbi na Naibu Waziri wa Mawasiliano, Sayansi na Teknolojia, Januari Makamba.

Makamba hivi karibuni amekuwa akitoa misaada kwa vikundi vya waendesha bodaboda katika mikoa mbalimbali, hali ambayo inatafsiriwa kuwa ni kujiimarisha kisiasa.

Hata hivyo, mwaka jana Rais Jakaya Kikwete ambaye pia ni Mwenyekiti wa CCM taifa alinukuliwa akisema kuwa sio vibaya kwa wanachama wa chama hicho kuonyesha nia ya kuwania nafasi za uongozi ndani ya chama, lakini siyo kufanya kampeni.

Mei 26 mwaka jana, Katibu Mkuu wa CCM, Abdulrahman Kinana akiwa mkoani Iringa, alisisitiza kwamba chama kitamwadhibu bila huruma mwanachama yeyote anayejipitisha katika maeneo mbalimbali na kufanya kampeni za kuwania urais kabla ya wakati.

Akifunga mafunzo ya makatibu na wenyeviti wa wilaya na mikoa mjini Dodoma mwaka jana, Rais Kikwete alisema kuwa inasikitisha kuona kuwa wapo baadhi ya watu ambao wameanza kujipitisha kwa viongozi wa chama na kuwapatia hela kwa ajili ya kuwapigia debe ili wawachague katika nafasi mbalimbali za urais ama bunge.

Alisema kuwa kimsingi kwa sasa wapo watu ambao wameishaanza kuzunguka na kujinadi kutafuta nafasi mbalimbali za kugombea, huku wakipenyeza rushwa jambo ambalo linaendelea kukishushia hadhi chama hicho.

Uchaguzi Serikali za Mitaa

Mangula akizungumzia uchaguzi wa serikali za mitaa utakaofanyika mwaka huu alisema, viongozi wote wanatakiwa kufuata taratibu na kanuni na kujiepusha na vitendo vya rushwa.

“Vitendo vya rushwa ndio vilitufanya katika chaguzi zilizopita kufanya vibaya, watu walinunuliwa kadi, sasa viongozi wa matawi wawe makini tusirudi tulikotoka na tukibaini mtu hafuati kanuni tutamwajibisha,” alisema Mangula.

Imetumwa na Editorial Team saa 1:14 AM kwenye habari za kitaifa